די וואל סטריט זשורנאל באריכט אז רעפובליקאנער סענאטאר פון סאוט קאראליינע, טים סקאט, גרייט זיך צו מעלדן אז ער לויפט פאר פרעזידענט אויף די רעפובליקאנער טיקעט אין 2024.
א ריכטער אין אטלאנטא האט געאורטיילט אז מען זאל טיילווייז פובליצירן די באריכט פון די דזשארדזשיע גרענד דזשורי איבער טראמפ'ס פרואוון צו איבערדרייען די 2020 וואלן.
פארטיידיגונגס סעקרעטאר לואיד אויסטין היינט ביי א פרעסע קאנפערענץ האט געזאגט אז די מיליטער האט דערווייל נישט באוויזן צו טרעפן ברוכטיילן פון די 3 אביעקטן וועלכע זענען אראפגעשאסן געווארן אין די לעצטע פאר טעג.
איינע פון די 8 פארוואונדעטע פון די היינטיגע יו-האול טראק קראך אין ברוקלין איז אומגעקומען. דער 44 יעריגער מאן איז געפארן אויף אן עלעקטראנישע ביציקל ווען די טראק האט אריינגעקראכט אין אים.
דער דרייווער פון די טראק איז אידענטיפיצירט געווארן אלס דער 62 יעריגער ווענג סאר, וועלכע האט געוואוינט אינעם טראק, און לויט באריכטן געשריגן צו די פאליציי אז זיי זאלן אים שיסן, און געזאגט אז ער וויל שטארבן.
זיינע מאטיוון זענען דערווייל נישט קלאר. פאליציי אויספארשער זאגן אז ווי עס שיינט האט ער אריינגעקראכט אין די פיסגייער און ביציקלעך ביים פרובירן צו אנטלויפן פון א פאליציאנט וואס האט אים פרובירט אפצושטעלן נאכן אראפקלאפן א פיסגייער, און עס איז ווארשיינליך נישט געווען קיין פאראויס געפלאנטע אטאקע.
היינט איז פארגעקומען היציגע מאמענטן אין די מדינת ישראל כנסת, ווען מיטגלידער האבן פארפירט און טייל האבן געדארפט ארויסגעפירט ווערן, ביי אן אפשטימונג פון די קאנסטיטוציאנאלע קאמיטע פאר די קאנטערווערסיאלע יוסטיץ רעפארמען.
אין קורצן:
די רעכטע אין לאנד טענה'ען אז די יוסטיץ סיסטעם האט צופיל מאכט. יריב לעווין פון ליכוד, דער יעצטיגער יוסטיץ מיניסטער, איז פון די גרעסטע קריטיקירער פון די יעצטיגע סיסטעם שוין פאר די לעצטע פאר יאר, און ער וויל איינשטעלן טוישונגען:
מבטל זיין די 'עילת הסבירות': די בג"ץ אין מדינת ישראל נוצט 'עילת הסבירות' (Reasonability) צו מבטל זיין אדער טוישן געזעצן וואס געזעצגעבער פירן אדורך, מיטן פארטייטשן וואס יענער האט געמיינט מיט'ן געזעץ, אדער אויב א געזעץ מאכט סענס לויט זיי. אהרן ברק האט עס אויסגעברייטערט אין זיין צייט אלץ הויפט ריכטער ארום 30 יאר צוריק, געבנדיג גאר אסאך מאכט פאר די יוסטיץ סיסטעם. דאס מבטל זיין וועט צווינגען די ריכטער צו פסק'נען קלאר לויט'ן געזעץ אָן פארטייטשן אדער צולייגן סברות.
מבטל זיין 'לשכת עורכי דין': די רעכטע ווילן טוישן דאס אויפנעמען ריכטער. יעצט האבן די בג"ץ און די 'לשכת עורכי דין' די מערהייט, און א וועטא מאכט, אין די קאמיטע וואס נעמט אויף די ריכטער. לעווין וויל אז כנסת פארשטייער זאלן באקומען די מערהייט וואָרט אין די קאמיטע צו שטעלן ריכטער. ווי אויך וויל ער מאכן געהעריגע פובליק היעריגס אין כנסת צו אויפנעמען ריכטער (ווי אין אמעריקע).
די לינקע אין לאנד מאכן מאסיווע פראטעסטן די לעצטע פאר וואכן מיט שווערע הונדערטער טויזענטער באטייליגער צו פראטעסטירן די טוישונגען. זיי שרייען אז דאס וועט אנמאכן 'עריצת הרוב' (Mob rule) - אז די מערהייט קאנטראלירט אלע סניפים פון די רעגירונג. די בג"ץ איז יעצט די איינציגסטע פליגל וואס באשיצט דעם מיעוט פון די מערהייט אין די רעגירונג, און דאס טוישן וועט לויט זיי "צעווארפן דעמאקראטיע".
די אמעריקאנער מיליטער זאגט אז זיי האבן באוויזן צו טרעפן די וויכטיגע טיילן פון די אראפגעשאסענע כינעזע שפיאנאזש באלון, אריינגערעכנט די ספעציעלע סענסארס און טעכנעלאגישע טיילן.
לאטערי באאמטע האבן נאך לאנגע מאנאטן פובליצירט די נאמען פון דער געווינער פון די רעקארד $2.04 ביליאן פאוערבאל לאטערי.
דער געווינער, עדווין קעסטרא, האט אנטזאגט די איינלאדענונג צו אויפטרעטן אין פובליק, אבער זיין נאמען איז ארויסגעלייגט געווארן און אזוי אויך דאס אז ער האט אויסגעוועהלט צו נעמען די איינמאליגע סומע פון $997.6 מיליאן.
א CBS באריכט זאגט אז די אמעריקאנער מיליטער האט שוין באאבאכט די כינעזע באלון פון ווען עס האט זיך געהויבן פון די דרום כינעזע בארטן. דאס מיינט אז אמעריקע האט שוין נאכגעקוקט די באלון נאנט צו א וואך בעפאר עס האט דערגרייכט אמעריקאנער טעריטאריע.
די ניו יארק סטעיט סענאט האט אין א פולע אפשטימונג אפגעווארפן 39-20 גאווערנער האוקאל'ס נאמינאציע, העקטאר לאסאל, פאר די טשיף ריכטער פון די סטעיט'ס העכסטע געריכט.
