נקדימון האט געשריבן:גאזפראם זאגט אז זיי וועלן האלטן נארד סטריעם 1 פייפליין -וואס ליפערט גאז פאר אייראפעישע לענדער - אפגעשפארט פאר דערווייל. אן אנגעבן א צייט ווען זיי וועלן עס צוריק שטעלן אין באניץ.
גאזפראם זאגט אז זיי האבן דאס געמיזט אפשטעלן צוליב אויל ליעקס און ארויסגעשטעלט א בילד
---
די שאלה ווילאנג קענען זיי שפילן די געים איבער א ליעק וואס דארף מכלומר'שט פאראלעזירן די גאנצע פייפליין
רוסלאנד האט געטוישט ניגון די וואך און זאגט יעצט ארויס ברחל בתך אז וויבאלד די מערב וועלט סאנקציעס שטערט צו קענען באקומען די נויטיגע טיילן צו פארריכטן די פייפליין ליעק, וועט זי בלייבן פארשלאסן ביז די פיראייניגטע מערב וועלט סאנקציעס ווערט אוועק גענומען. קרעמלין ווארטזאגער פעסקאוו מיט א גלאטקייט: "עס איז נישט פארהאן קיין שום אנדערע סיבה צו שטערן דאס פאמפען פון די פעלדער".
אין פאקט זאגט די פירמע וואס געבט זיך אפ מיט פארריכטן די טורבינעס אז אזא ליעק טוט געווענליך בכלל נישט אפעקטירן די ארבעט פון די טורבינע און קען ווערן פאראכטן אויפן פלאץ. עס איז א מינדערוויכטיגער פראצעדור.
גיי שלאג דיך מיט פעסקאוו...
די פראגע שטעלצעך וואס וויל פוטין דערמיט, וואס שטייט אייראפע אויס די ווינטער און וואס קען רוסלאנד טון מיט די שפע פון גאז וואס זי איז באשאנקען?
טראכט נישט וואס דער אקס טראכט ווייל דער אקס טראכט נישט... חחח...
איך בין נישט אין פוטינס קאפ און איך פלאן נישט צו זיין. אבער שפעקולירן מעג מען. פוטין האפט פאר א סענעריא ווי די אוקריינער פאלן צוריק אין זייער פאזיציעס אדער עכ"פ מאכן נישט קיין גרויסע פארשריט אין די קומענדיגע חדשים. די כערסאנער קאנטער אפענסיווע קאסט די אוקריינער פארלוסטן עד אין שיעור און ברעגט א שוואכע ריטורן אין שטחים.
פוטין האפט עס קומט א פראסטיגער ווינטער פאר אייראפעישע לענדער, פרייזן שטייגן ביזן דאך. קוים א טראפן גאזאלין צו טרעפן. עס איז דא שוואך הייצונג, ווער רעדט נאך ווען עס וועט בכלל נישט זיין קיין הייצונג, דאס האט די פאטענציאל צו פירן (אדער וועלן די רוסישע אנדרייערס העלפן קאכן א קאשע) צו אביסל מהומות ווי די המון עם אין דייטשלאנד צו אנדערע אייראפעישע לענדער זאלן מאכן א ויצעקו אין די גאסן, פארוואס זאלן אונז שטיצן אוקריינע וואס האט נישט קיין ערענסטע סוקסעסן נאך פארשווענדן ביליאנען דאלארן פון הילף און אונז פריר מיר פאר קעלט... וואס וועט לייגן דרוק אויף אייראפעישע פירערס זאלן זיך איבערטראכטן מיט שטיצן אוקריינע בלינדערהייט.
(דאס איז קלאר אז די מערב וועלט קוקט שטארק ארויס אויב אוקריינע וועט דעליווערן ערענסטע געוואונסן אין כערסאן. די מאס שטיצע ווענדט זיך שטארק דערין).
שוין וואס דארפעך מאכן זיינע שפעקולאציעס. אז עס וועט זיין אפדעיטס איבער אייראפעישע הייצונג וועט מען עס אי"ה מעלדן.
למעשה זיצט פוטין מיט ביליאנען אויף ביליאנען גאלאנען מיט גאז. וואס טוט ער דערמיט? די פשוט'ע תירוץ איז אז פוטין האט געמאכט א געשעפט מיט כינע ווי ער וועט אנשטאט עקספארטירן גאז קיין אייראפע וועט ער עס רידעקטירן קיין כינע. טאקע פאר היפש ביליג אבער פארט א געשעפט. נאכדערצי עס ברענגט נאנטער די קאאפעראציע צווישן די קאמוניסטישע שכנים.
אין פאקט איז עס ווייט פון ריכטיג.
אויב רוסלאנד וויל אוועק גיין פון עקספארטירן רוב פון איר נאטירליכע גאז צו אייראפע, וועט זי דארפן אינגאנצן איבערבויען איר נאטירליכע גאז אינפראסטרוקטור. סיי די פייפליינס און סיי די לנ"ג'ס (די 'ליקיופייד נעטשרעל געז' טערמינאלן).
דאס איז עפעס וואס נעמט נישט איין יאר, נישט צוויי יאר, נאר יארן יארן לאנג. שטייצעך עס שלעפט אריין אין קאסטן פון שווערע הונדערטע ביליאנען דאלארן.
רוסלאנד'ס צוויי גרעסטע גאז פעלדער יורענגאוי און יאמבורג זענען ביידע לאקירט אינעם צפון טייל רוסלאנד און פון דארט ווערט געליפערט ביליאנען קיוביק מעטער נאטירליכע גאז צו פולע אייראפעישע לענדער. לעת עתה האט רוסלאנד נישט קיין שום פייפליין צו פירן נאטירליכע גאז פון דארט קיין כינע. און איז כמעט אוממעגליך זיי זאלן ווערן געפירט קיין כינע אין די נאנטער צוקונפט.
עס איז דא די סייבעריע פייפליין וואס ליפערט נאטירליכע גאז פון רוסלאנד קיין כינע. די גאז קומט פון די טשעיאנדע גאז פעלד. דאס איז פול קלענער און נאנטער ווי די יורענגאוי און יאמבורג גאז פעלדער.
- 20220906_213108.jpg (87.27 KiB) געזען 5745 מאל
צום ביישפיל, די סייבעריע פייפליין איז אפיציעל אוועק געשטעלט געווארן אין 2007, קאנסטרוקציע האצעך אנגעהויבן אין 2012 און איז פארטיג געווארן זיבן יאר שפעטער אין 2019. עס האט גענימען גאנצע צוועלעוו יאר מיט זיבן יאר קאנסטרוקציע צו פארטיגן די פייפליין.
מען רעדט פון יארן. און דאס איז נאך פול קורצער אויב זאל רוסלאנד באשליסן צו אנהייבן דירעקטירן די נאטירליכע גאז פון יורענגאוי און יאמבורג גאז פעלדער דורך פייפליינס קיין כינע.
פייפליינס איז נישט די איינציגסטער מהלך צו ליפערן גאז. די גאז פייפליינס לויפן נישט איבער איבער אלע קאנטינענטן ארום די גאנצע ערד-קוגל. דא קומט אריין די ליקוואד נעטשרעל געז טערמינאלן. די טערמינאלן זענען ריזיג גרויס. דארט ווערט די גאזן אויסגעארבעט, און עס פרירט איין די נאטירליכע גאז אז עס שרינקט זעקס הונדערט מאל קלענער אין מאס.
זעקס הונדערט קיוביק מעטער נאטירליכע גאז ווערט דורך די קעלט און גאנצע פראצעדור פארוואנדלט און געשרינקען צו איין קיוביק מעטער ליקיופייד נעטשרעל געז. א גראך ווערט צוגעלייגט פאר זיכערהייטס סיבות. פון די טערמינאלן ווערן זיי געליפערט צו ריזיגע טאנקיר שיפן צו אנדערע טראנספארט מיטלען.
די ספעציעל אויסגעשטאטע טאנקיר שיפן איינמאל זיי קומען אן צו זייער ווייטע דעסטינאציע אריבער די אקעאנען, ווערן זיי אריינגעפירט צו א טערמינאל ווי דארט ווערט די גאז צוריק אנגעווארעמט צו איר אריגינעלער טעמפעראטור און די איין קיוביק מעטער ווערט צוריק זעקס הונדערט קיוביק מעטער נאטירליכע גאז. פון דארט ווערט די גאז געליפערט דורך פארשידנארטיגע פירמעס צו הייצן אונזערע הייזער און אנדערע באדערפענישן.
יעצט אויב רוסלאנד וויל עקספארטירן גאז פון איר לנ"ג טערמינאלן אוועק פון אייראפע צו אנדערע דעסטינאציעס האבן זיי אויך א פראבלעם. רוסלאנד האט צוויי הויפט לנ"ג טערמינאלן. די יאמאל טערמינאל און די סאכהאלין טערמינאל. בלויז די יאמאל טערמינאל איז פארבינדן מיט די גרויסע גאז פעלדער ווי יורענגאוי און יאמבורג און די ארומיגע גאז פעלדער. די יאמאל טערמינאל איז נאנט געאגראפיש צו די גאז פעלדער אין צפון רוסלאנד. פול נאנטער צו אייראפע ווי צו כינע.
- 20220906_194144.jpg (196.26 KiB) געזען 5745 מאל
*אין צענטער צפון זעט מען די יאמבורג און יורענגאוי גאז פעלדער.
*גלייך העכער זיי איז די יאמאל טערמינאל. די גאנצע אינפראסטרוקטור איז אויסגעשטעלט אז אלעס פארט לינקס קיין אייראפע.
* מער רעכטס צו דרום זעט מען די סייבעריע פייפליין וואס שעפט פון די טשעיאנדע גאז פעלד.
*אינגאנצן דרום רעכטס. טיף מזרח רוסלאנד, רעכטס פון כינע זעט מען די סאכהאלין טערמינאל.
די יאמאל טערמינאל האט א יערליכע קאפאציטעט פון פראדוצירן זעכצן אהאלב מיליאן טאן פון ליקיופייד נעטשרעל געז. דאס איז אזוי סך ווי כמעט דריי אין צוואנציג קיוביק מעטער פון נאטירליכע גאז (עטליכע הונדערט ביליאן גאלאן). דאס איז איבער פערציג פראצענט פון די יערליכע קאפאציטעט פון די נארד סטריעם 1 פייפליין. א געוואלד.
די יאמאל טערמינאל איז געאגראפיש גאר ווייט צו עקספארטירן גאז קיין אזיע.
צו צולייגן נאך א קרישקעלע, רוסלאנד האט זיך איינגעהאנדלט א פלאטע פון גאר סאפיסטיקירטע טאנקיר שיפן צו טראנספארטירן ליקיופייד נעטשרעל געז פון די יאמאל טערמינאל קיין אזיע (די מקח האט קיין שייכות מיט די יעצטיגער אינוואזיע). דאס איז אויסגעשטאט צו קענען ברעכן פארפרוירענע ימ'ען. די פראבלעם איז אז זיי זענען גאר שטארק אנגעוואנדן אויף אייראפעישע פאבריקן פאר מעינטענענס.
אין קורצן: די רוסישע גאז אינפראסטרוקטור איז אין גרויס טייל אויסגעשטעלט צו ליפערן איר אינהאלט קיין אייראפע. דאס דירעקטירן צו גיין קיין אזיע וועט נעמען יארן לאנג און אריינשלעפן אין אומגעהויערע קאסטן וואס געשעט נישט איינס צוויי.
אז נישט קיין אייראפע וועט רוסלאנד דארפן געצוואונגענערהייט פטור ווערן פון ביליאנען גאלאנען גאז אן פארדינען א גרייצער דערויף.