נעכטן זענען אפגעהאלטן געווארן נאך א רייע פריימערי וואלן אין עטליכע שטאטן איבער'ן לאנד; אין מישיגען, מיזורי, אריזאנע און וואשינגטאן.
מישיגען
אמטירנדע דעמאקראטישע גאווערנער וויטמער איז געלאפן אין די פריימעריס אן קיין קעגנער, און פארמאגט די פארטיי'ס נאמינאציע צו לויפן פאר נאך א טערמין אלס גאווערנער.
אויף די רעפובליקאנער זייט האבן זיך ארגינעל פארמאסטן 10 קאנדידאטן, אבער נאר 5 האבן באוויזן צו צוזאמנעמען גענוג אונטערשריפטן צו ערשיינען אויפ'ן שטים צעטל.
טודאר דיקסאן, א באקאנטע ביזנעס פרוי אין די סטעיט און געוועזענע רעפארטער אויף א קאנסערוואטיווע טשענעל, איז דערקלערט געווארן געווינערין אין די פארמעסט. זי האט אין די לעצטע טעג פון די קאמפיין ערהאלטן טראמפ'ס אינדארסירונג וואס האט איר ארויפגעשטופט אין די אנקעטעס, זי האט ארויסגעצויגן א מאסיווע זיג אין די פארמעסט.
די איבריגע קאנדידאטן זענען: קעווין רינק אויך א ביזנעסמאן, וועלכער איז געלאפן אויף א פראָ ביזנעס פלאטפארמע, און איז אריינגעקומען ווארשיינליך אין 2'טן פלאץ; גערעט סאלדאנא, א ארטיגער קייראפראקטער און שרייבער, וועלכער איז מיינסטנס צייט געשטאנען פאראויס סיי מיט פאנדרעיזינג און סיי אין די אנקעטעס האט אבער גאר שוואך אנגעצויגן און איז אריינגעקומען דריטער, און רייען קעלי, אן ארטיגער ריעל עסטעיט בראוקער און ביזנעסמאן האט אויך שוואך אנגעצויגן אריינקומענדיג פערטער.
- קאנגרעסיאנאלע פריימערי פארמעסטן - די סטעיט פארמאגט 14 זיצן אין קאנגרעס וועלכע איז איצט צוטיילט 7-7 צווישן ביידע פארטייען, אבער האט פארלוירן א זיץ נאך די לעצטע צענזוס ציילונג.
אין די 11'טע דיסטריקט וואו עס האבן זיך פארמאסטן 2 אמטירנדע דעמאקראטישע קאנגרעס מיטגלידער, האט די מעסיגע קאנדידאט אמטירנדע קאנגרעספרוי העילי סטיווענס, געוואונען די פארמעסט באזיגנדיג דעם פראגרעסיווער קאנגרעסמאן ענדי לעווין, וועלכער פארטרעט איצט די (געוועזענע) 9'טע דיסטריקט. די פארמעסט האט געצויגן גאר אסאך אויפמערקזאמקייט צוליב וואס דארט האט זיך אויסגעשפילט די אינערליכע קאמף אינערהאלב די דעמאקראטישע פארטיי צווישן די מעסיגע און די ראדיקאלע פליגלען, און אויך צוליב וואס די פראגע איבער די שטאנד פון די דעמאקראטישע פארטיי איבער אמעריקע'ס מיליטערישע שטיצע צו מדינת ישראל האט שטארק דאמינירט די פארמעסט, מיט עטליכע מדינת ישראל'ישע לאביאירונג ארגאניזאציעס קעמפנדיג צווישן זיך, ווען 'עיפעק' (AIPAC) שטיצט גאר שטארק סטיווענס, און די רעלאטיוו נייע לינקע ארגאניזאציע 'דזשעי סטריט' (J Street) שטיצט לעווין.
אין די 3'טע דיסטריקט אויף די רעפובליקאנער זייט, האט דער טראמפ געשטיצטער קאנדידאט דזשאן גיבס, א געוועזענער סאפטוועיר אינדזשעניר און פאליטישער קאמענטאטאר, און געוועזענער טראמפ אדמיניסטראציע באאמטער, געוואונען און שמאל באזיגט דעם אמטירנדער קאנגרעסמאן פיטער מאיער. טראמפ האט געפירט א שווערע קאמף ארויס צו דערזעהן מאיער צוליב וואס ער האט געשטימט צו אימפיטשען טראמפ אין די 2'טע אימפיטשמענט.
- -
אין מיזורי זענען פארגעקומען סענאט און קאנגרעס פריימערי פארמעסטן אין ביידע פארטייען, אבער די רעפובליקאנער סענאט פריימערי פארמעסט איז די הויפט צוליב וואס דער רעפובליקאנער נאמינאציע איז ווארשיינליך דער געווינער אין די אלגעמיינע וואלן.
נאך וואס לאנגיעריגער רעפובליקאנער סענעטאר ראי בלאנט האט געמאלדן אז ער וועט נישט לויפן פאר ווידערוויילונג האבן זיך געיאוועט קאנדידאטן צו איבערנעמען די זיץ, אזויפיל ווי 21 קאנדידאטן זענען ארויף אויפ'ן שטים צעטל.
דער דערקלערטער געווינער איז עריק שמידט, דער אמטירנדער אטוירני דזשענעראל אין די סטעיט, ער האט ארויסגעצויגן א באקוועמע זיג. אין צווייטן און דריטן פלאץ זענען אריינגעקומען מיזורי קאנגרעספרוי וויקי הערצלער און דער געוועזענער גאווערנער עריק גרייטענס, וועלכער איז געצווינגען געווארן צו רעזיגנירן אין 2018 צוליב סקאנדאלן איבער שמוציגע אויפפירונג. ווי באריכטעט האט טראמפ אינדארסירט 'עריק' אן אנגעבן וועמען ער מיינט, אנגעבנדיג אז ער פארלאזט זיך אויף די מיזורי בירגער צו פאסן די ריכטיגע באשלוס.
אין די 1'טע קאנגרעסיאנאלע דיסטריקט דעמאקראטישע פריימערי פארמעסט, האט אמטירנדע ראדיקאלע קאנגרעספרוי קארי בוש ארויסגעצויגן א מאכטפולע זיג באזיגנדיג איר קעגנער, אן ארטיגער סטעיט סענעטאר, סטיוו ראבערטס, וועלכער איז געווען דער יונגסטער שווארצער מאן צו דינען אין די מיזורי סטעיט סענאט.
- -
אין קענזעס, וועלכע איז געווען די ערשטע סטעיט צו אפהאלטן א 'בירגער אנפראגע' איבער די טעמע פון אבאורשן, אין ליכט פון די היסטארישע סופרים קאורט אורטייל צו אנולירן ראו ווס. וועיד. האט די 'נישט טוישן די קאנסטיטוציע' געוואונען מיט איבער 60% בירגער.
די פראגע צו די בירגער איז געווען צי מען זאל צולייגן צו די קאנסטיטוציע אן אמענדמענט וואס זאל לויטן אז די די פראצעדור איז נישט קיין קאנסטיטוציאנאלע רעכט, וואס דאן מיינט עס אז די סטעיט לעגיסלאטור קען אדורכפירן געזעצן צו גענצליך פארבאטן די פראצעדור, אדער זאל מען לאזן די קאנסטיטוציע אזוי ווי עס איז יעצט, וואס דאן אפילו אויב די לעגיסלאטור, וועלכע איז איצט קאנטראלירט דורך רעפובליקאנער, פירט אריבער געזעצן צו איינצוימען די פראצעדור וועלן זיי דאס נישט קענען גענצליך פארבאטן.
- -
אין אריזאנע זענען פארגעקומען פארמעסטן אין ביידע פארטייען אויפ'ן גאווערנער זיץ, צו ערזעצן דעם ארויסגייענדיגער רעפובליקאנער גאווערנאר דאג דוסי וועלכער קען נישט לויפן פאר ווידערוויילונג נאכן אויסדינען די מאקסימום טערמינען. אזוי אויך איז פארגעקומען סענאט און קאנגרעס פריימערי פארמעסטן.
- גאווערנער פארמעסטן
אויף די דעמאקראטישע זייט האט קעיטי האָבס, אמטירנדע סעקרעטערי אוו סטעיט, ברייט געוואונען די פארטיי'ס נאמינאציע פאר גאווערנער.
אויף די רעפובליקאנער זייט האט זיך אפגעשפילט איינס פון די מערסט פראמינענטע פאליטישע פארמעסטן צווישן געוועזענער פרעזידענט טראמפ און זיין וויצע־פרעזידענט פענס, ווען טראמפ האט הייס אינדארסירט און פערזענליך אראפגעקומען קאמפיינען פאר זיין קאנדידאט, קערי לעיק, א געוועזענע זשורנאליסט, און פענס האט אינדארסירט קערין טעילאר-ראובסאן, א לויער און איינגעשטעלטע אין די ארטיגע באורד אוו רידזשענטס, זי האט אויך געהאט די פולע שטיצע פונעם אמטירנדער רעפובליקאנער גאווערנער דוסי. די קאמפיין איז געווען גאר א היציגע, און אן קיין קלארע 'פראנט ראננער', ווען די אנקעטעס גייען ארויף און אראפ גיבנדיג אביסל מער שטארקייט פאר לעיק.
ביזדערווייל, איז די פארמעסט נאכנישט גערופן געווארן זייענדיג צי נאענט צו דערקלערן א זיכערע געווינערין, אבער יעצט שטייט לעיק מיט א 1.8% אויבערהאנט, ווען לעיק האט 46.2% און ראובסאן 44.4%.
- סענאט פארמעסטן
אויף די דעמאקראטישע זייט איז אמטירנדער סענאטאר מארק קעלי געלאפן אן קיין פריימערי קעגנער.
אויף די רעפובליקאנער זייט האבן זיך פארמאסטן 5 הויפט קאנדידאטן. דער טראמפ אינדארסירטער קאנדידאט בלעיק מעסטערס, א ביזנעסמאן און אינוועסטירער; דזשים לעימאן א מיליטערישער וועטעראן; מארק בערנאוויטש, דער אמטירנדער אטוירני דזשענעראל. בלעיק מעסטערס איז דערקלערט געווארן געווינער, מיט 39.0% קעגן 28.8% פאר לעמאן וועלכער איז אריינגעקומען די צווייטער.
- סעקרעטערי אוו סטעיט
אויף די רעפובליקאנער זייט האבן זיך פארמאסטן 4 הויפט קאנדידאטן, דער טראמפ אינדארסירטער קאנדידאט מארק פינטשעם, אן ארטיגער סטעיט לעגיסלאטור; באו לעין; שאָנאַ באליק, אן ארטיגע סטעיט לעגיסלאטור; מישעל יודזשענטי-ריטא, אן ארטיגע סטעיט סענאטאר. פינטשעם איז דערקלערט געווארן זיגער מיט א באדייטענדע אויבערהאנט איבער די איבריגע קאנדידאטן.
אויף די דעמאקראטישע זייט פארמעסטן זיך 2 קאנדידאטן, געוועזענער מאריקאופע קאונטי באאמטער עידריען פאנטעס און אן ארטיגער סטעיט לעגיסלאטור רעדזשינאלד באלדינג. די פארמעסט איז נאכנישט גערופן געווארן, אבער פאנטעס האלט אן אן אויבערהאנט.
-וואשינגטאן
אין וואשינגטאן איז די סיסטעם אז די צוויי העכסטע פריימערי קאנדידאטן, אפגעזעהן די פארטיי אפיליאציע, פארמעסטן זיך אין די אלגעמיינע וואלן.
- סענאט פארמעסט -
אין די סענאט פארמעסט האבן זיך פארמאסטן 18 קאנדידאטן, אריינגערעכנט אמטירנדע דעמאקראטישע סענאטאר פעטטי מאָרי וועלכע איז אריינגעקומען אין ערשטן ארט און וועט לויפן פאר א 6'סטע סענאט טערמין. אין צווייטן ארט איז אריינגעקומען א רעפובליקאנער קאנדידאט טיפאני סמיילי, א געוועזענער נורס, און זי וועט זיך פארמעסטן קעגן מארי אין די אלגעמיינע וואלן אין נאוועמבער.
- סעקרעטערי אוו סטעיט -
אין די פארמעסט פאר סעקרעטערי אוו סטעיט איז דער אמטירנדער סעקרעטאר סטיוו האָבס אריינגעקומען אין ערשטן ארט און וועט לויפן אין די אלגעמיינע וואלן, אבער ווער זיין קעגנער וועט זיין איז נאכנישט אנטשידן געווארן זייענדיג דערווייל צי שמאל.
- קאנגרעסיאנאלע פארמעסטן -
פון צווישן די קאנגרעסיאנאלע פריימעריס ווערן די קומענדיגע 2 פארמעסטן גאר שטארק נאכגעקוקט, צוליב וואס די אמטירנדע רעפובליקאנער קאנגרעס מיטגלידער זענען פון די לעצט פארבליבענע אמטירנדע רעפובליקאנער צו שטימען פאר טראמפ'ס אימפיטשמענט, און דער געוועזענער פרעזידענט האט גאר שטארק געקעמפט זיי צו ערזעצן.
אין די 3'טע דיסטריקט וועלכע ווערט איצט פארטרעטן דורך רעפובליקאנער קאנגרעספרוי הערערא באוטלער וועלכע זוכט ווידערוויילונג, איז א דעמאקראטישע קאנדידאט, מאריע גלאוזענקעמפ פערעז, אריינגעקומען אין ערשטן ארט און וועט לויפן אין די אלגעמיינע וואלן קעגן באוטלער וועלכע איז נאך ביזדערווייל נישט פארזיכערט מיטן צווייטן ארט. דער טראמפ אינדארסירטער קאנדידאט דזשאו קענט, א געוועזענער גרין בערעט אפיציר, איז ביזדערווייל אין דריטן ארט נאך באוטלער מיט מעגליכע שאנסן איר צו איבערשטייגן.
אן ענליכע בילד שפילט זיך אפ אין די 4'טע דיסטריקט וואו דער אמטירנדער רעפובליקאנער קאנגרעסמאן דען ניוהאוז איז אריינגעקומען אין ערשטן ארט, א דעמאקראטישער קאנדידאט דאג ווייט, אן ארטיגער ביזנעסמאן, איז אריינגעקומען צווייט, און דער טראמפ אינדארסירטער קאנדידאט לארען קאלפ, אן ארמיי וועטעראן און לאנגיעריגער פאליציי אפיציר, אין דריטן ארט.
די פארמעסט איז ווייט פון פאראיבער נעמענדיג אין באטראכט אז מען האט נאכנישט געציילט קיין 50% פראצענט פון די שטימען, און קיין איין קאנדידאט איז נאכנישט פארזיכערט צו לויפן אין די אלגעמיינע וואלן.