ציניזם איז א טערמין וואס ווערט אפט באניצט אומריכטיג (נישט בלויז אין אידיש). ובכן, אט איז דער באדייט פונעם ווארט:
דער מקור פון ציניזם קומט פון א גרופע גריכישע פילאזאפן וועלכע האבן אנגעקוקט די גאנצע מענטשהייט אלס עגאאיסטיש און קארופטירט. זיי האבן געזען די גאנצע ציוויליזאציע אלס א בלאף, ווען אלעס מיינט בלויז אנכיות און שלעכטקייט. זיי האבן דעריבער ממאס געווען אלע תענוגי עולם הזה ווי געלט, כבוד, און מאכט, און געלעבט א לעבן פשוט ווי ס'קען נאר זיין, טוענדיג מעשים זיך דווקא צו פארשעמען, געגאנגען אנגעטון אין שמאטעס, און געלעבט אפגעריסן און אפגעשליסן.
א ציניקער איז עמיצער וואס קוקט אויף אלעם מיט א הויכן מאס סקעפטיציזם. ס'איז נישט דא קיין גוטס אויף דער וועלט, אלעס איז פארפוילט און פאלש, און יעדע זאך וואס איינער זאגט ווייסט ער "די עכטע באהאלטענע כוונה". ציניקער וועלן זיך אפט באניצן מיט סארקאזם, אבער די צוויי מוזן נישט גיין צוזאמען. פאלגנד זענען ביישפילן פון צינישע סטעיטמענטס (איבערגעטייטש פון
דא):
איך האב געהערט אז דער "טעלעוויזע סטאר" איז געפארן צום ווייטן מזרח ארויסהעלפן די געשעדיגטע פונעם צונאמי. וואס טוט מען נישט פאר פי-אר...
וואס פעלט אויס דאס גיין שטימען? די פאליטיקאנטן זענען ממילא א שטיק פארדארבנקייט און זוכן נאר צו טרעפן דזשאבס פאר זיך און דער משפחה.
ס'האט זיך אים נאר געלוינט אז זיין קראנקע אלצהיימער מאמע איז געשטארבן. באקומען א שיינע ירושה, און ער דארף מען נישט ברעכן קאפ זיך אפצוגעבן מיט איר.
ווען איין מענטש שטארבט איז עס א טראגעדיע. ווען צוואנציג מיליאן מענטשן שטארבן איז עס א סטאטיסטיק.
יענער האט מיר אנגעטראגן צו קומען באזוכן ביי דער ארבעט און ברענגען אביסל עסן. ער וויל זיכער סתם כאפן א בליק אויף מיינע סחורה.
מיט אזויפיל ביכער, אויסגאבעס, גליונות, בראשורן, קאמפיינס, און ווירטואלע ארטיקלען, וואקסט דער אידישער ליטעראטור ווי אויף הייוון. וואס וועט זיין מיט א אידישן ספעל טשעקער?