"וואס וואלט געווען אויב פרייע מענטשן וואלטן געקענט לעבן פארזיכערט מיט די וויסענשאפט אז זייער זיכערהייט ליגט נישט אויף די סטראשע פון א באלדיגע אמעריקאנער קאנטער אטאקע צו אפשרעקן א סאוויעטישע אטאקע, נאר אז מיר קענען אינטערסעפטן און צושטערן באליסטישע מיסילס נאך בעפאר זיי דערגרייכן אונזער ערד אדער פון אונזערע אליאירטע?"
האלט מיר יעצט שוין עטליכע יאר, און 200 ביליאן דאלער אויסגעגעבן אויף דעם שפעטער, לאמיר זעהן וואס איז די פלאן אין פאל אמעריקע ווערט באטראפן פון א נוקלעארע אטאקע פון צפון קארעא, איראן, כינע אדער רוסלאנד, וואס זיי קענען טון זיך צו באשיצן, און וואס איז די פלאן פאר קאנטער אטאקעס.
זאל אבער יעדער זיין זיכער, און קיינער זאל נישט ווערן אנגעצויגן, עס זעהט נישט אויס ווי עס וועט זיין אין די נאנטע צוקנופט א נוקלעארע מלחמה, און אפילו אויב אמעריקע און נאטא וועלן יא ווערן פארמישט אין די קריג אין אוקריינע איז אויך דא גאר גאר קליינע שאנסן אז עס וועט זיך דערקייקלן צו א נוקלעארע מלחמה, ווי שפעטער ברייטער אויסגעשמועסט.
לאמיר אפלאזן די הייפערסאניק מיסילס פאר יעצט, פון דעם האמיר שוין געשמועסט, לאמיר רעדן פון די געווענליכע אינטערקאנטינענטל באליסטישע מיסילס (ICBMs), מיט א נוקלעארע שפיץ.
קודם א קורצע הקדמה, עס זענען פארהאן 4 סארטן באליסטישע מיסילס. די ערשטע איז 'שארט רעינדזש באליסטישע מיסילס (SRBM) דאס קען פליען ביז 1000 קילאמעטער ווייט.
נאכדעם איז דא 'מידיעם רעינדזש באליסטישע מיסילס' (MRBM) דאס קען פליען צווישן 1000 און 3000 קילאמעטער ווייט.
נאכדעם איז דא 'אינטערמידיעט רעינדזש באליסטישע מיסילס' (IRBM) וואס דאס קען פליען צווישן 3000 און 5500 קילאמעטער ווייט.
נאכדעם איז דא די 'אינטערקאנטינענטל באליסטישע מיסילס' (ICBM) וואס דאס קען פליען פון 5500 און ווייטער.
די סכנה פאר אמעריקע זעלבסט איז פון אינטערקאנטינענטל באליסטישע מיסילס (ICBMs).
יעצט לאמיר פארשטיין וויאזוי א ICBM פליט.
די באליסטישע מיסיל ווערט ארויסגעשאסן מיט א ראקעט וואס שיסט עס ארויף, דאס ווערט גערופן די 'בוסט פאזע' דאס נעמט צווישן 2 און פינעף מינוט, וואס דאן פליט די מיסיל ארויף אין ספעיס. דערנאך איז דא די 'מידקורס פאזע' וואס דאן טיילט זיך די באוואפענטע שפיץ אפ פונעם ראקעט און עס פארט אין ספעיס, געווענליך ערגעץ ארום 30 מינוט, ווענדט זיך צו וואו עס פארט, און דערנאך איז דא די 'טערמינאל פאזע' וואס דאן קומט עס שוין אראפ צום ציהל, דאס נעמט געווענליך א מינוט אדער ווייניגער.
יעצט איז דא דריי אפציעס אראפצושיסן דעם מיסיל. אין די ערשטע פאזע איז אבער שווער ווייל מען דארף עס גענוג שנעל אויפכאפן, און האבן א אינטערסעפטאר מיסיל ארויסשיסער, אדער א ספעציעלע באמבארדיר פליגער גענוג נאנט אז עס זאל קענען גרייכן די מיסיל פאר עס איז אין ספעיס, אבער דעמאלסט איז עס טעכניש די גרינגסטע אראפצושיסן צוליב די ראקעט וואס עס האט נאך מיט זיך, און עס איז זייער גרינג צו אויפכאפן.
די צווייטע פאזע איז די מערסטע פראקטיש, צוליב וואס דארט איז עס די לענגסטע, די פראבלעם איז אבער אז מען דארף עס קענען פונקטליך טרעקן, דאס איז אבער נישט אזא פראבלעם מיט די היינטיגע סעטעלייטס און פארגעשריטענע ראדארן, די מיסילס קומען אבער מיט פארשידענע טעכנאלאגיעס צו אויסשפילן די ראדארן, צווישן אנדערע, ווען די שפיץ טיילט זיך אפ פונעם ראקעט און פליט אין ספעיס אין די 'מידקורס פאזע', שיקט עס אויך מיט פאלשע מיסילס גערופן 'דיקויס' וואס דאס זעהט אויס ווי די מיסיל אבער איז בעצם א דאמי, און דאס איז געמאכט צו צומישן די ראדארן, און אז די אינטערסעפטאר זאל אריינקראכן אין דעם דיקוי אנשטאט אין די עכטע מיסיל.
אין די דריטע פאזע איז גאר שווער עס אראפצושיסן צוליב די קורצע צייט, און מען דארף האבן די נויטיגע גאר שנעלע מיסילס וואס זאלן עס קענען אויפרייסן ווען עס איז נאך גענוג ווייט פון די ציהל, אבער למשל אויב אזא מיסיל קומט צו פליען אויף אן עירקרעפט קעריער קען מען עס נאך דעמאלטס אפהאלטן.
יעצט צו די אמעריקאנע מיסיל שוץ סיסטעמען. אמעריקע האט 44, 40 אין אלאסקא און 4 אין קאליפארניע, פון א מיסיל שוץ סיסטעם, גערופן 'גראונד בעיסד מידקורס דעפענס' (GMD), וואס דאס זענען ספעציעלע אינטערסעפטארס געמאכט אראפצושיסן אינטערקאנטינענטל באליסטישע מיסילס אין זייער מידקורס פאזע.
ווי שטארק אפעקטיוו די סיסטעם איז, איז א מחלוקת הפוסקים, א שטודיע דורכגעפירט דורך די American Physical Society זאגט אז די סיסטעם איז ווארשיינליך נישט זייער אפעקטיוו צוליב פארשידענע אורזאכן וואס זיי געבן אן, אבער די פענטאגאן האט עס שטארק אפגעווארפן און געזאגט אז די שטודיע איז באזירט אויף אלטע דאטא, און פארשטייט זיך אסאך דעטאלן זענען קלאסיציפירט, און די GMD איז שטארק אפעקטיוו, זאגענדיג אז אין 2017 אליינס איז געווען 2 טעסטס, ווען 2 אינטערקאנטינענטל באליסטישע מיסילס זענען געקומען צו פליען, און מיט 3 אינטערסעפטאר מיסילס האט די GMD באוויזן אראפצושיסן ביידע ICBMs.
חוץ פון דעם האט אמעריקע די Aegis סיסטעם, וועלכע איז אינסטאלירט אויף אמעריקאנער נעיווי שיפן, און דערנאך איז די 3 ערד באזירטע Aegis סיסטעמען, אין פוילן, ראמעניע, און א טעסט סייט אין האוואי, וואס דאס קען אויך גענוצט ווערן אלס א פאקטישע דעפענס סיסטעם.
די Aegis איז נישט ארגינעל געמאכט געווארן פאר אינטערקאנטינענטל, נאר פאר ביז אינטערמידיעט רעינדזש (IRBM) , און איז זייער סוקסעספול, אבער די נעיווי האט אין 2020 דורכגעפירט א טעסט אויף אן אינטערקאנטינענטל מיסיל (ICBM), און די Aegis האט עס סוקסעספול אראפגעשאסן אין די מידקורס פאזע, אזוי אויך זאגט די נעיווי אז דאס קען מעגליך געניצט ווערן אין די ערשטע בוסט פאזע, אויב די שיף למשל איז גענוג נאנט, און מעגליך אויך אין די לעצטע טערמינאל פאזע.
דערנאך איז דא די THAAD ערד מיסיל דעפענס סיסטעמען, וואס זענען ארגינעל אויך נישט געמאכט געווארן פאר ICBMs, נאר זענען געמאכט פאר ביז אינטערמידיעט רעינדזש באליסטישע מיסילס (IRBM), די THAAD איז גאר סוקסעספול און איז נאכנישט דורכגעפאלן אין קיין איין טעסט, און איז געמאכט צו אראפשיסן די באליסטישע מיסילס אין די טערמינאל פאזע, דאס הייסט אויפן וועג אראפ.
די אמעריקאנע מיליטער זאגט אז דאס קען אויך סוקסעספול ארבעטן קעגן ICBMs, די פראבלעם איז אבער אז עס דארף זיין גענוג נאנט, אלזא, טעארעטיש, אויב לייגט אמעריקע THAAD סיסטעמען ביי די באוואוינטע שטעט א שטייגער ווי ניו יארק אדער לאס אנדזשעלעס וועלן זיי טאקע זיין באשיצט, אבער דאס קען נישט באשיצן גאנץ אמעריקע, נאר אין די געגנט ארום וואס עס איז סטאנציאנירט. אנדערש פון די אויבנדערמאנטע GMD סיסטעמען וועלכע זענען יא דא צו באשיצן גאנץ אמעריקע.
אגב איז אין 2017 געווען א גאנצע סומאטאכע ווען 2 קאנגרעסלייט האבן געזאגט אז די מיסיל דעפענס אגענטור (MDA) טראכט פון ארויסלייגן די THAAD סיסטעמען אויף די אמעריקאנער מערב ברעג, און די אגענטור און די פענטאגאן האבן עס אפגעלייקנט... בקיצור...
יעצט דארף מען פארשטיין נאך א זאך, די אלע מיסיל שוץ סיסטעמען זענען נישט אויסגעשטעלט צו באשיצן פון רוסלאנד.
די סיסטעמען זענען געמאכט אז אויב למשל צפון קארעא שיקט איינס אדער אפילו 10 באליסטישע מיסילס, דארפן די שוץ סיסטעמען אנגעבליך קענען אפהאלטן די מיסילס.
פארשידענע עקספערטן זאגן גאר אז אפילו אויב כינע וועט שיסן זייערע ארום 100 ICBMs אויף אמאל קיין אמעריקע, איז אויך דא א שיינע מעגליכקייט אז אלע סיסטעמען צוזאמען זאלן עס קענען אפשלאגן. ויש לדון בזה...
אויב אבער זאל רוסלאנד שיקן זייערע 527 ICBMs וואס זיי האבן אנגעבליך גרייט, אפילו אן זייערע ריזיגע נוקלעארע סטאקפיילס, וועט דאס זייער שנעל איבערקומען די אמעריקאנע דעפענס סיסטעמען, און די דעפענס סיסטעמען וועלן ארויסגיין פון באנוץ, צוליב וואס עס קען נישט האנדלען אזויפיל מיסילס אויף אמאל.
יעצט, וואס געשעהט אויב פוטין צופירט זיך די הענט, זיינע ארומיגע שטעלן אים נישט אפ - א זאך וואס וועט ווארשיינליך נישט געשעהן צוליב אורזאכן וואס וועלן שפעטער ערקלערט ווערן, - און ער באהאגלט אמעריקע מיט נוקלעארע סחורה. וואס איז דאן אמעריקעס פלאן?
עס איז דא א באקאנטע טערמין גערופן MAD -
(Mutual assured destruction) ס'איז א טעאריע פון די קאלטע קריג, וואס מיט דעם טוט מען אפשרעקן די שונא, אז אפילו איין לאנד, לאמיר זאגן אמעריקע, ווערט אטאקירט פון א נוקלעארע אטאקע, און ווערט חרוב ונחרב, וועט גלייך צוריקקומען אויף רוסלאנד א פולע נוקלעארע אטאקע, דאס מיינט אז אפילו רוסלאנד אטאקירט פלוצלינג אמעריקע, און אמעריקע פאלט דורך און ווערט מיאוס צושלאגן, האט רוסלאנד נישט קיין מעגליכקייט פון איבערלעבן, ווייל די גאנצע נוקלעארע סטאקפייל ווערט אויסגעליידיגט אויף זיי. א בחינה פון גם לי וגם לך לא יהיה, אבער אויף א שרעקעדיגע פארנעם...
צו דעם זאגט די דעפארטמענט אוו דעפענס אז זיי האבן דריי וועגן דאס צו טון:
די ערשטע איז ערד באזירטע ארויסשיס צענטערן וואס האבן גרייט 400 אינטערקאנטינענטל באליסטישע מיסילס מיט נוקלעארע שפיצן וואס זענען אויף די העכסטע אלערט צו יעדע צייט, צוטיילט אין 5 שטאטן אין אמעריקע.
די מיסילס ווערט ארויסגעשאסן רימאוטלי דורך אונטערערדישע קאמענד צענטערן וואס זענען אין קאנטאקט מיטן פרעזידענט און די נויטיגע מיליטערישע באאמטע.
אויב זאל די קאנטאקט צווישן די קאמענד צענטערן ווערן אפגעהאקט און זיי קענען נישט ארויסשיסן די מיסילס, האט אמעריקע גרייט 24/7 א ספעציעלע לופט קאמענד גערופן די 'עירבארן לאנטש קאנטראל סענטער' (ALCS) וואס איז אין א נעיווי E-6B באואינג פליגער, און זיי האבן א פולע קאמענד צענטער און די נויטיגע פערסאנעל מיט א שטענדיגע גרייטקייט צו ווייטער קאמיוניקירן און ארויסשיסן די קאנטער נוקלעארע מיסילס.
די צווייטע איז סובמארינען. די סובמארינען זענען גרייט אויף די ווייטע מעגליכקייט אז אלע פון די גרייטע אנגעשפיצטע מיסילס און די ערד ארויסשיס צענטערן ווערט אראפגעווישט.
אמעריקע האט צו יעדע צייט עטליכע סובמארינען אויף די העכסטע אלערט, און זיי זענען באוואפענט מיט מערערע נוקלעארע מיסילס, אזוי סאך, אז יעדע סובמארין פאר זיך, אויב זאל עס גערעכנט ווערן אלס א לאנד, וואלט עס געהאט די זעקסט גרעסטע נוקלעארע ארסענאל...
אפילו גאר גאר הויכע מיליטערישע באאמטע ווייסן נישט וואו אויף די וועלט די סובמארינען געפונען זיך, עס איז ממש טאפ טאפ סיקרעט, און עס איז אנדיטעקטעבל, און אפילו אויב די גאנצע נוקלעארע סטאקפייל וואס געפונט זיך אין אמעריקע זעלבסט ווערט אפגעווישט דורך א רוסישע אטאקע אויף די מיליטערישע באזעס, האבן די סובמארינען אליינס גענוג און נאך אראפ צו ווישן גאנץ רוסלאנד מיט א שמוץ אריבער.
דערנאך איז דא די לופט אפציע.
א פלאטע פון 46 B-52H און 20 פון די גאר מאכטפולע B-2A ספיריט באמבאדיר עראפלאנען, וואס די B-2A ספיריט עראפלאנען זענען אינגאנצן סטעלט, און קענען אויסמיידן די מערסט פארגעשריטענע דעפענס סיסטעמען, און באמבארדירן מיט נוקלעארע וואפן אפילו די מערסט באשיצטע צילן, און די פלאטע איז גרייט צו יעדע צייט צו דעליווערן פעשע נוקלעארע פעקלעך איבעראל אויפן כדור הארץ אין געציילטע מינוטן.
די אלע אויבנדערמאנטע חברה זענען גרייט 24-7 צו יעדע צייט אויב אמעריקע ווערט אטאקירט, הייבן זיי אויטאמאטיש אן צוריקשיסן אויף די לאנד וואס האט געשאסן. און מיט דעם שרעקט מען אפ אנדערע לענדער אז זיי זאלן נישט טראכטן פון אטאקירן אמעריקע, ווייל אפילו אויב עס געלונגט זיי צו געבן גאר שטארקע קלעפ און אפווישן אמעריקע, וועלן זיי אבער נישט אפגעשוינט ווערן און אויך גענצליך חרוב ווערן.
צוליב דעם זאגן מערערע עקספערטן אז אפילו אויב וועט געשען די ווייטע ווייטע מעגליכקייט און פוטין וועט אינגאנצן צודרייט ווערן און פארארדענען א נוקלעארע אטאקע אויף אמעריקע זעלבסט, וועט עס אבער נישט אראפ גיין די נויטיגע טשעין אוו קאמענד דאס צו קענען אויספירן, ווייל זיינע ארומיגע וועלן קיינמאל נישט זיין גרייט צו באגיין זעלבסטמארד און לאנד-מארד און חרוב מאכן גאנץ רוסלאנד אין געציילטע מינוטן.
אגב, אסאך עקספערטן האלטן - שפעקולירן - האפן... אז די רוסישע נוקלעארע סטאקפייל איז אין זייער א שלעכטע צושטאנד.
זיי זאגן אז עס איז בעצם א קל וחומר. מה דאך די וואפן וואס זיי דארפן טאקע נוצן איז אין אזא שלעכטע צושטאנד, א שטייגער ווי טאנקן און די פלעינע מיסילס, וואס דאס האבן זיי געוויסט אז זיי גייען עס דארפן נוצן, און זיי נוצן עס כסדר, און דאך איז עס ממש גארביטש.
נוקלעאר וואס קיינער חלומ'ט דערווייל נישט פון נוצן, איז זיכער אז עס איז נישט גוט מעינטעינד.
זיי האבן א מאגערע דעפענס בודזשעט פון ארום 70 ביליאן דאלער, אין פארגלייך צו אמעריקע וואס שטייט ביי נאנט צו 800 ביליאן...
אנדערע אנאליסטן זאגן אבער פארקערט, אז צוליב דעם איז רוסלאנד'ס קאנווענציאנאלע וואפן אזוי נאכגעלאזט ווייל זיי נוצן זייערע אלע געלטער פון זייער דעפענס בודזשעט צו אנגרייטן און ארויפארבעטן זייערע נוקלעארע וואפן.
אזוי צו אזוי איז דאס בלויז השערות וואס קיינער וויל פארשטייט זיך נישט אויספרובירן...
געוויסע ווילן זאגן אז אמעריקע האט א קלאסיפיצירטע סיסטעם וואס קען יא אפשלאגן אן אטאקע פון רוסלאנד, אבער דאס איז מער ווייניגער ווישפול טינקינג לויט רוב, אבער מען קען קיינמאל נישט וויסן...
נאך א זאך וואס איז גוט צו וויסן, איז אז אפילו אויב רוסלאנד זאל יא טון די זעלבסטמארד אקט און אטאקירן אמעריקע, וועלן זיי נישט צילן קיין באוואוינטע שטעט א שטייגער ווי ניו יארק, נאר מיליטערישע אינפראסטרוקטור, און די נוקלעארע סטאקפיילס, און נאך אזא אטאקע, וועלן זיי שוין נישט קענען שיסן צום צווייטן מאל אויף אמעריקע ווייל זיי וועלן ווארשיינליך מער נישט זיין. לויט א וועלט בארימטע נוקלעארע שרייבער און אנאליסט, סטעפאן שווארטץ.
אט איז א מאפע פון אים פון רוסישע צילן פאר אן אטאקע:
- IMG_20220326_231443_045.jpg (90.14 KiB) געזען 3324 מאל
דארפן מיר אבער אייביג געדענקען אז אם השם לא ישמר עיר שוא שקד שומר...
סייווי קען דער עולם זיין רואיג ווייל וויכי האט מיר קלאר געזאגט אז ער שטייט גרייט 24 שעה א טאג אפצושלאגן רוסישע אטאקעס, און ער האט סוקסעספול אפגעשלאגן די קרעמלין באט אטאקע. קען זיין ס'איז קלאסיפייד אינפאו, אבער קיינער האט אים נישט געבעטן זיך צו אנטרינקן אין א גרינע ליל שישי...
