צו מיין טייערע שמש שיח"י,
קודם כל ווי איך דיר באדאנקען פאר די פילע גיטע זאכען וואס די טוסט פאר אונזער בהמ"ד שטענדיג, פון זיכער מאכען אז די ביהמ"ד איז ציכטיג ריין יעדע פרימארגן, די נעכטיגע ציפיצעלטע קאווע גלעזלעך זענען אוועק געווארפן. די מקווה איז פיין ווארים אויף די פונקט ריכטיגע טעמפארוטאר, און די האנטוכער זענען א מחיה'. און די שווערע שעות וואס די געסט אוועק לטובת הכלל זענען שווער ארויסצוברענגען אויף א בלויזע פאפיר.
אבער דאך פיל איך פאר גאר וויכטיג, נישט נאר פאר מיר, נאר פאר אלע מתפללים און עלטערע אידן דיר צו מעורר זיין אויף גאר א וויכטיגע נקודה. היינט ביים אריינקומען אין בהמ"ד האב איך באמערקט אז צום באדוירען האט אונזער בהמ"ד נאכנישט אראפגענומען די שעדליכע האנטיכער וואס הענגען ביי אלע סינקס.
די האנטוכער שטעלן אונז אין א גרויסע סכנה ח"ו פון די שרעקעדיגע קאראנע ווירוס, די האנטוכער איז ממש א סגולה וואס אויב זאל נאר איין אנגעשטעקטער זיך באנוצען דערמיט איז עס גרויסע טשאנסען אז עס וועט זיך פארשפרייטן צו דעם גאנצן בהמ"ד היל"ת. דעמאלטס וועט מען שוין נישט דארפן קלינען די טישען פאר כאטשיג צוויי וואכען צו מער.
עס כאפט מיר אהן א שרעק פון בלויז טראכטען פון די עלטערע אידן דא ביי אונז, אדער חס וחלילה די תשב"ר שלא טעמו טעם חטא.
וואס זענען זיי שולדיג?? מיר ווייסן טאקע אז קהל האט גאר אן אנגעשטרענגטע בודזשעט און בעצם קען מען זיך נישט ערלויבן צו צולייגן נאך הוצאת פון פעיפערס און זייף פאר די הענט מיט די האלטער.
אבער ביטע זיי נישט קיין רוצח! פארשמיר נישט דיינע הענט מיט אידיש בלוט! ווי וועסטו קענען זאגן ידינו לא שפכו את הדם הזה!?. עס זענען זיכער דא גיטע אידן וואס זענען מסכים צו מנדב זיין פאר א חודש צוויי די זאכען, 'אין הצלת ישראל גדול מזה' 'כל המקיים נפש אחת מישראל, כאילו קיים עולם מלא! ביטע צו דער זאך שוין יעצט, נישט ווארט ווען עס איז שוין חס ושלום צי שפעט!
א באזארגטע מתפלל