א פרישע באריכט ווייזט אן אז דורכאויס די קאוויד פאנדעמיע האבן די 10 רייכסטע מענטשן אין די וועלט פארדינט אזויפיל, אז זינט מארש 2020 האבן זיי געדאפעלט זייער קאלעקטיווע רייכטום פון 700 ביליאן ארויף צו 1.5 טריליאן, און אז עס איז כמעט יעדן איינציגן טאג אויפגעקומען נאך א ביליאנער, אין די צייט וואס איבער די לעצטע יאר זענען א געשאצטע 160 מיליאן מענטשן אראפגעשטופט געווארן אונטער די ארימקייט ליניע.
די באריכט צייגט אז אילאן מאסק'ס רייכטום איז געשטיגן מיט 1000%, און ביל געיטס מיט בערך 30%.
א פרישע שטודיע אין ארץ ישראל צייגט אז די שוץ וואס א פערטע בוסטער שאט געבט צו, איז נישט צופיל שטערקער ווי נאך די דריטע, און איז נישט אפעקטיוו אפצוהאלטן פון אנגעשטעקט ווערן מיט די אמיקראן וואריאנט.
שוועדן האט געמאלדן אז מען וועט מער נישט דארפן קיין נעגאטיווע קאוויד טעסט צו קענען אריינקומען אין לאנד, נאך וואס עס האט סייווי גארנישט אויפגעטאן צו אפשטעלן די אמיקראן וואריאנט.
אין אנדערע נייעס האט סקאטלאנד געמאלדן אז פון קומענדיגע מאנטאג וועט מען אראפנעמען אלע פרישע באגרעניצונגען וואס איז ארויפגעלייגט געווארן אין ליכט פון די אמיקראן וואריאנט.
די וואל סטריט זשורנאל באריכטעט אז טעקסאס און פלארידע האבן זיך צוגעשטעלט צו יוטא און איידעהא, און האבן שוין צוריקבאקומען אלע דזשאבס וואס זענען פארלוירן געגאנגען פון קאוויד.