פרעזידענט טראמפ וועט היינט אנפירן א צערעמאניע אינעם מזרח צימער אין ווייסן הויז אונטערצושרייבן די ערשטע פאזע פונעם האנדל אפמאך מיט כינע * פיטער געינאר איז נעכטן געווארן באשטעטיגט דורכן סענאט צו דינען פערמענאנט אלץ פימא דירעקטאר מיט 81-8 די ניין שטימען זענען געקומען פון בראון, דזשיליברענד, העריס, מענענדעז, שומער, סטעבענאו, יודאל און ווען האלען * ספיקער פעלאסי האט נעכטן געמאלדן אז קאנגרעסמאן גראסיא פון אילינאי ווערט געשטעלט אלץ פארזיצער פון די נאטורליכע ריסוירסעס קאמיטע די פירערשאפט איז ביז איצט געהאלטן געווארן דורך ניו דזשערסי רעפובליקאנער ומלפנים דעמאקראט דזשעף ווען דרו * קאנגרעס מאיאריטעט פירער סטעני האיער האט געמאלדן אז ענדע יונואר למספרם וועט מען שטימען אויף א ביל צוריקצודרייען די 2002 למספרם אויטאריזאציע פאר מיליטערישע באנוץ אין איראק און צו פארבאטן צו נוצן שטייערצאהלער געלטער אונטערצונעמען מיליטערישע שריט אקעגן איראן אן קאנגרעסיאנאלע ערלויבעניש * אין קאנגרעס האט מען נעכטן געשטימט אויף רולס איבער ווי אזוי צו דעבאטירן צוויי בילס אויפן טיש איינס איז איבער באשיצונגען פאר עלטערע ארבעטער און א צווייטע איבער די רעגולאציעס ווען די עדיוקעישאן דעפארטמענט קען מוחל זיין סטודענט חובות ניין דעמאקראטן האבן געשטימט אקעגן די פארטיי פארגעשלאגענע רולס ברינדיסי פון ניו יארק, קעיס פון האווייאי, קאנינגהעם פון דרום קאראליינע, גאלדען פון מעין, הארן פון אקלאהאומא, מעקעדעמס פון יוטא, מורפי פון פלארידא, שראדער פון ארעגאן און שעריל פון ניו דזשערסי * די קאמערץ, העלפ און אפראפריעשאנס סענאט קאמיטעען ווועלן זיך היינט אוועקזעצן אינאיינעם צו באהאנדלען די USMCA וועלכע איז ערווארטעט צו ווערן באשטעטיגט אין סענאט שפעטער אין וואך * מען גרייט זיך פיבערהאפטיג אויף די אימפיטשמענט פראצעס וועלכע איז געסקעדזשועלט זיך אנצוהויב קומענדיגע וואך אזוי ווי אין די פארגאנגענהייט וועט די פראצעס פארקומען אין די מיטאג שטונדן און זיך אנהויבן טעגליך אום איינס אזייגער די פארמיטאג שטונדן וועט קענען ווערן אויסגענוצט דורך סענאטארן וועלכע לויפן פאר פרעזידענט אריינצוכאפן וויפיל אויפטריטן נאר מעגליך און אויך פאר הויפט ריכטער דזשאן ראבערטס וועלכע גייט אינדערפרי אויסהערן מונדליכע ארגומענטן און נאך א לייכטע מיטאג דארפן אריבערלויפן די גאס צו קעפיטאל היל אנצופירן מיטן אימפיטשמענט פראצעס * סענאט פירער מעקאנעל האט נעכטן געלאדנט סענאטארן קרוז, לי, גרעהעם און קארנין פאר א זיצונג צו דיסקוסירן אימפיטשמענט סטראטעגיע קרוז האט געזאגט אז מען זאל צוגיין צו די עדות פראגע ווי ריכטיגע פארהאנדלער און איינגיין אויף באלטאן אין אויסטויש פאר האנטער און מעקאנעל האט צוגעשטימט צום פלאן * די נעווער טראמפ רעפובליקאנע סופערפעק גערופן "די לינקאלן פראיעקט" גייט ציהלן קאלאראדא סענאטאר קארי גארדנער אין א פרישע רעקלאמע בליץ צו לייגן דרוק ער זאל אפווייכן פון זיין שטיצע צום פרעזידענט * קוקנדיג אויף די געלט וועלכע איז אריינגעקומען צו דעמאקראטישע פרעזידענט קאנדידאטן דורך די עקט בלוי וועבזייטל האט בערני סאנדערס דערווייל אויפגעטריבן דאס מערסטע געלט פון פרויען ביישטייערונגען פון סיי וועלכע אנדערע קאנדידאט * געוועזענע מאסאטשוסעטס גאווערנאר דעוואל פעטריק האט אין די ערשטע זעקס וואכן פון זיין קאמפיין פאר פרעזידענט אויפגעטריבן 2.2 מיליאן דאלער און געענדיגט דעם למספרם יאר מיט 3.2 מיליאן דאלער אין די באנק * דזשאן היקענלופער וועלכע צום סענאט ארויסצשטויסן דעם אמטירנדע רעפובליקאנע סענאטאר קארי גארדנער האט אויפגעטריבן אינעם לעצטן יאר פערטל פון 2019 למספרם 2.8 מיליאן דאלער * די רעפובליקאנע פארטיי אין קענטאקי באשולדיגט אז עימי געקגרעט וועלכע לויפט צום סענאט אעגן סענאטאר מיטש מעקאנעל האט פארלעצט FEC רעגולאציעס ביים באהאנדלען געוויסע קאמפיין ביישטייערונגען * די דעמאקראטישע קאנגרעס פריימערי אין מאסאטשועטס שיילט זיך ארויס צו זיין גאר אינטערסאנט אויפן אינדארסירונג פראנט ווי באריכטעט א צייט צוריק טוען סענאטארן אין אלגעמיין שטיצן דעם אמטירנדע סענאטאר עד מארקי און סענאטארשע קירסטען סינעמא שטיצט שטארק קענעדי פון די אנדערע זייט האט מארקי ערהאלטן שטארקע שטיצע פון קאנגרעס און אפילו פון גאר ליבעראלע מעמבערס ווי קארטעז אצינד הערט מען אז אויך קענעדי האט פארשפאט א רייע קאנגרעס אינדארסירונגען פון אזלעכע מיטגלידער ווי דזשאן לואיס, דזשאואקווין קאסטרא און קאנאר לעמב * רעי מעקווייער איז א לאנגיעריגע סיטיגרופ עקזעקוטיוו מיט א היסטאריע פון ביישטייערן פאר דעמאקראטן און איז געווען א מיטגליד אויף די פינאנץ טיעם פון קאמאלא העריס ער ווערט איצט געמוטיגט דורך פריינט צו לויפן פאר ניו יארק סיטי בירגערמייסטער * אין א זיג פאר דעמאקראטן האט אן אפעלאט געריכט אין וויסקאנסין געלייגט אויף האלד אן ארדער זאפארט ארויסצושניידן אזויפיל ווי 209 טויזנט נעמען פון די וויסקאנסין וויילער רעגיסטראציע ליסטע * די סופרים קאורט האט לעצטנס צוריקגעשיקט די קעיס איבער די נייע טראמפ ארדער צו באנייען טויט שטראף אויף א פעדעראלע שטאפל צום די סי סירקוט היינט וועלן די סירקוט ריכטער אויסהערן די ארגומענטן און די קעיס וועט גאנץ מעגליך שנעל זיין צוריק אין סופרים קאורט * אקעי, שוין ערווענט געווארן אין די נייעס דא אויפן וועלטל מיט א צייט צוריק אז די ניו יארק סטעיט קלאגעס אקעגן פאול מענעפארט זענען געווארן ארויסגעווארפן אבער בלויז אויפן שפיץ גאפל אצינד איז דא א גלעגענהייט אביסל מער אריינקוקן אין די ניו יארק סטעיט מענעפארט קעיס והמסתעף
אלזא, אום דעצעמבער 18 2019 למספרם האט א ניו יארק סטעיט ריכטער ארויסגעווארפן די סטעיט קלאגעס איבער מענעפארט שווינדלערייען צוליב וואס די קלאגעס אריינגעטראגן זענען נישט אויסגעהאלטן לויט די סטעיט געזעץ נישט אנצוקלאגן איין מענטש פארן צוויי מאל פאר די זעלבע פארברעכן און אין אונזער פאל שמאכטעט שוין מענעפארט אין פעדעראלע טורמע פאר די זעלבע פארברעכנס וואס מאנהעטען דיסטריקט אטוירני סיירוס וועינס האט אים געזוכט ווידעראמאל אנצוקלאגן די רעכענונג פון וועינס אריינצוטראגן די קלאגעס איז געווען אז דער ריכטער וועט נעמען אין באטראכט געוויסע אויסנאמען אין די סטעיט געזעץ וועלכע ערלויבן אין געציילטע פעלער יא אנצוקלאגן צוויי מאל אויפן זעלבן פארברעך
צו ערשט א פיצינקע איבערזיכט אויף די פעדעראלע קעיס
אין 2018 למספרם האט א פעדעראלע דזשורי געפונען מענעפארט שולדיג אין צוויי קאונטס פון באנק שווינדל און זיך נישט געקענט פאראייניגן אויף זיבן אנדערע קאונטס אויך פון באנק שווינדל אלע פון זיי פארבונדן צו מיסאינפארמאציע אויף מארטגעדזש אפליקאציעס באזונדער איז ער געווארן געפונען שולדיג אויף נאך פינף קאונטס פון פעלשן שטייער בויגן רעטוירנס און איין קאונט פארן פארפעלן צו איינגעבן זיינע אויסלענדישע בענק אקאונטס אבער די אלע קלאגעס זענען נישט פארבונדן/רעלעוואנט צו די ניו יארק סטעיט קעיס ווי דערמאנט איז אויף די זיבן פון די 9 באנק שווינדל קאונטס געווען א האנג דזשורי און ריכטער עליס האט זיי ארויסגעווארפן אויפן ארט זאגנדיג אז ער האט נאך ניטאמאל געהעריג אריינגעקוקט אין זיי אבער שפעטער ביים סענטענסינג האט ער קלארגעשטעלט אז נאך א טיפערע אריינבליק בלייבן יענע קאונטס ארויסגעווארפן
צוריק קיין ניו יארק, עטליכע טעג בעפאר ריכטער עליס האט אין ווירדזשיניע ארויסגעגעבן זיין סענטענסינג האט א מאנהעטען גרענד דזשורי אנגעקלאגט מענעפארט מיט זעכצן סטעיט שווינדל קלאגעס באזירט אויף די זעלבע אומריכטיגע מארטגעדזש אפליקאציעס אויף וועלכע די פעדעראלע דזשורי אין ווירדזשיניע האט אים געפונען שולדיג און ווי די ניו יארק טיימס האט צו יענע צייט באריכטעט איז די סטעיט קלאגעס געווארן ארקעסטרירט צו פארמיידן א טראמפ פארדאן פון ערלויבן מענעפארט צו גיין פריי לויט א סופרים קאורט אורטייל ברייט געדעקט דא מיט א צייט צוריק איז אזא דאפלטע קלאגע נישט קיין פראבלעם מיט די פיפטע אמענדמענט זינט די נייע קלאגעס קומט פון די סטעיט און נישט פון די פעדעראלע רעגירונג אבער לויט די ניו יארק סטעיט געזעץ איז עס יא געווען א פראבלעם אבער ווי דערמאנט האט דיסטריקט אטוירני וועינס זיך סומך געווען אויף די אויסנאמען וועלכע די געזעץ פארמאגט די געזעץ ערלויבט דאפלטע קלאגעס אין צוויי אויסנאם פעלער ואלו הן די ערשטע אויסנאם איז אין פאל וואס א געריכט ווארפט ארויס קלאגעס צוליב וואס די פראצעדור ווי אזוי די קלאגעס זענען געווארן פארגעלייגט איז נישט געווען ריכטיג אין די פארמאט פון די קלאגעס קען נישט פירן צו קיין שולד אורטייל אבער די געריכט גלויבט אז מען קען זיי איבערמאכן און גיבן א שאנס פאר פראקורארן זיי ווידער פארצולייגן מיט מער סוקסעס
דיסטריקט אטוירני וועינס האט געהאפט אז די קאונטס וועלכע ריכטער עליס האט ארויסגעווארפן צוליב האנג דזשורי און איז יא געווען א טייל פון די סטעיט קלאגעס וועט צוליב די אויסנאם קוואליפיצירן צו ווערן ווידער פארגעלייגט אין סטעט געריכט אבער ריכטער מעקסוועל ווילי האט עס נישט אקצעפטירט זאגנדיג אז ווען ריכטער עליס אין ווירדזשיניע האט ארויסגעטראסקעט די האנג דזשורי קאונטס האט ער נישט פארארדנט מעגליכע ווידער אריינבליק אין זיי און גאנץ קלאר געזאגט אז ער גלויבט נישט אז פראקורארן קענען ווידער אריינקוקן אין זיי
די צווייטע אויסנאם אינעם געזעץ איז מער לומד'יש, נעמליך, אז אויב עימיצער באגייט אן קרימינאלע אקט וועלכע איז אחת שהן שתים, דאס הייסט אז ער האט טאקע געטוהן איין זאך אבער די געזעץ האט צוויי באזונדערע פראבלעמען דערמיט "און" די צוויי באזונדערע אומלעגאליטעטן פארמאגן באזונדערע עלעמענטן אין זיך מטעם די געזעץ (לאפוקי אויב די רעגירונג האט בלויז ארויפגעווארפן נאך א קאונט וועלכע איז בשורש די זעלבע ווי די ערשטע קאונט) "און" די אורזאך פארוואס די רעגירונג האט עס באצייכנט ווי צוויי באזונדערע פארברעכנס (און נישט פאררעכנט ווי בלויז איין פארברעך) איז צו פארמיידן מענטשן פון באגיין צוויי באזונדערע סארט פון פיינטליכע שעדיגונג בהעלם אחת מיט איין אקט (דהיינו, אז לאמיר זאגן אז אויב א מענטש טוט רויבט מיט ציהל און ווייסט אז ער באגייט דאדורך צוויי עוולות אבער ער קימערט זיך בלויז מיט איין פועל יוצא פון די צוויי אבער ער איז באווואסטזיניג אז אויף יענע פועל יוצא וועט ער נישט ווערן אנגעקלאגט זינט די רעגירונג וועט אים קלאגן אויף די ערשטע עוולה וואס ווערט באגאנגען מיט זיין אקט און די רעגירונג וועט נישט קענען קלאגן צוויי מאל)
ווען דיסטריקט אטוירני וועינס האט איבערגענוצט די ווירדזשיניע קאונטס אין די סטעיט געריכט האט ער טאקע גענוצט אנדערע געזעצליכע פראבלעמען וועלכע קומען ארויס פון די זעלביגע באנק שווינדלערייען מען האט געקלאגט אין ווירדזשיניע און ריכטער ווילי האט איינגעשטימט אז די באזונדערע פראבלעמען פארמאגן טאקע באזונדערע עלעמענטן אין זיך מטעם די געזעץ אבער די באזונדערע פארבלעמען שטאמען נישט פון און טוען נישט עכט זיין ארקעסטרירט צו פארמיידן מענטשן פון באגיין צוויי באזונדערע סארט פיינטליכע שעדיגונג מיט איין אקט
מער ספעציפיש האט ריכטער ווילי ארויסגעברענגט אז סיי די פעדעראל און סיי די סטעיט געזעץ צו קרימינאליזירן רעזידענשל מארטגדזש שווינדל זענען געציהלט צו פארמיידן די סארט פינאנציעלע שווינדל וועלכע האט געפירט צום 2008 למספרם פינאנציעלע קראך און נישט אז די סטעיט געזעץ האט געזוכט צו פארמיידן אנדערע סארט תוצאות וועלכע קענען ארויסקומען פון באנק שווינדל ווי דאס וואס די פעדעראלע רעגירונג האט געוואלט
ריכטער ווילי האט אויסגעפירט אז אויך די אנדערע סטעיט קלאגעס איבער קאנספיראציע, פעלשעווען ביזנעס רעקארדס, איז אויך געציהלט צו פארמיידן די זעלבע פראבלעמען וואס די פעדעראלע געברענגטע קלאגעס זענען געציהלט און ער איז שוין געווארן איינמאל געקלאגט אויף זיי
די אורטייל פון ריכטער ווילי איז געווען א שטארקע פראסק פאר דיסטריקט אטוירני וועינס וועלכע האט פרובירט צו נוצן די אויסנאמען וועלכע די געזעץ האט פארמאגט שוין אין די צייט פון די פארברעכן אבער ער איז דורכגעפאלן וועינס האט אבער פארשפראכן צו אפעלירן די אורטייל און פרובירן צו איבערצייגן די העכערע געריכטן אז די געזעץ כמו שהי' מקדם האט יא געגעבן רעכט צו קלאגן מענעפארט
און א באזונדערע אונטערנעמונג אויף מכאן ולהבא האבן ליבעראלן און טראמפ פיינט אין די סטעיט שוין מאנאטן איידער די מענעפארט אורטייל איז ארויסגעקומען אנגעהויבן ארבעטן דראסטיש צו רעפארמירן די געזעץ אז עס זאל קענען גענוצט ווערן אנצוקלאגן צוקונפטיגע פארברעכנס וועלכע וועלן ווערן אויפגעדעקט אינערהאלב די אדמינסטראציע די רעפארמען זענען געווארן אונטערגעשריבן דורך גאווערנאר קאומא אום אקטאבער 16 למספרם און טוט נישט באהאלטן אירע מאטיוון ווען די טויש וואלט שוין געווען אין אפעקט ווען מענעפארט וואלט באגאנגען זיינע פארברעכנס וואלטן אים די אינסטאנצן זייער לייכט געקענט אנקלאגן אן דארפן אויפקומען מיט קאמפליצירטע ערקלערונגען וועלכע ריכטער ווילי האט טאקע נישט אקצעפטירט
די נייע געזעץ אדורך אין די דעמאקראטיש קאנטראלירטע לעגיסלאטור וועלכע רעפארמירט די געזעץ נישט צו קלאגן דאפלט און ערלויבט יא אריינצוטראגן אזעלכע קלאגעס אין פאל דער פעדעראל אנגעקלאגטער קען ווערן באגאנדיגט דורכן פרעזידענט
די נייע טויש מאכט אן אויסנאם צו ערלויבן דאפלטע אנקלאגעס אנטקעגן עקזעקוטיווע פליגל באאמטע וועלכע סערווירן אויף פאזיציעס צו וועלכע מען דארף האבן סענאט באשטעטיגונג, געוועזענע מיטגלידער פונעם פרעזידענט'ס עקזעקוטיווע שטאב, און געוועזענע קאמפיין איינגעשטעלטע, טראנזישאן גרופע, ביזנעס איינגעשטעלטע, אדער נאן פראפיט ארגאנאזאציעס וועלכע וועלן געניסן פון א פרעזידענטליכע פארדאן אויף פעדעראלע פארברעכנס און אזוי אויך פאמיליע פונעם פרעזידענט אזוי ווייט ווי צווייטע קוזינען די געזעץ גייט נאך ווייטער אז אפילו אין פאל די ברייטע אויסנאמען באווייזן נישט צו גרייכן און ציהל און עמיצער נאנט צום פרעזידענט פאלט נישט אונטער איינע פון די אויבנדערמאנטע קאטעגאריעס טוט אבער די נייע טויש ערלויבן אנצוקלאגן אפילו אזעלכע וועלכע זענען בלויז געווען אומדירעקט פאראנטווארטליך צוצוהעלפן פאר אנדערע פארבונדן מיטן פרעזידענט צו באגיין פארברעכנס
צ' כפופה וץ' פשוטה... היינו נאמן כפוף נאמן פשוט. וברש"י: נאמן כפוף - אדם כשר צריך להיות כפוף ועניו וסופו להיות פשוט וזקוף לעולם הבא:(שבת קד.) בלאג - מיינע ארכיוון
צ' כפופה וץ' פשוטה... היינו נאמן כפוף נאמן פשוט. וברש"י: נאמן כפוף - אדם כשר צריך להיות כפוף ועניו וסופו להיות פשוט וזקוף לעולם הבא:(שבת קד.) בלאג - מיינע ארכיוון