קרומע גראדקייט

[שמחת עולם]

מיט א צינישע שמייכל האט ער באטראכט ווי זיין פעטער הייבט אויף ביידע נאסע הענט און זאגט ארויס די ווערטער "שאו ידיכם קודש" מיט א קאכעניש, אין הארצן האט ער אים אויסגעלאכט און אפילו אביסל רחמנות געהאט אויף די צוריק געשטאנענע לעבנסשטייגער פון זיין באליבטן פעטער.

טראץ וואס ער האט אים פערזענליך שטארק ארויפגעקוקט און געשעצט, האט ער אבער שטענדיג אראפגעקוקט און געלאכט פון די סארט פירונג און פאנאטישע אידעאלאגיע.

אין זיינע אויגן באלאנגן די סארט מענטשן צו א נידעריגערע קלאס ווי ער אליינס און זיינס גלייך וועלכע גייען שטענדיג אנגעטון מיט ציכטיגע אנצוגער און גלאט ראזירטע באקן. ווען נישט דאס זאל זיין זיינס א פעטער, וואלט ער ווארשיינליך נישט געשטאנען מיט אים אין ווארט, ער וואלט זיך נישט פארביליגט צו האבן א שייכות מיט אן אזוי גערופענע אולטרא ארקטאדאקסע יוד.

דער נעפע מיט'ן גלאנצעדיגע נעקטיי האט אבער רעספעקטירט זיין פעטער און קיינמאל נישט געזוכט אריינצוגיין מיט אים אין קיינע דעבאטעס אדער געשפרעכן איבער זיין וועג פון לעבן, נאך אלעמען איז זיין ליבשאפט צו אים געווען גרויס, ווי די נאטור איז פון א געשוועסטער קינד צו א פעטער.

מיט געטריישאפט האט ער צוגעלייגט א פלייצע צו די שטוב געברויכן און כסדר געשטאנען צו הילף פאר זיין מומע וועלכע האט זיך באצויגן צו אים ממש ווי אן אייגן קינד.

ווען א פרעמדע האט געזען די צוויי שטיין צוזאמען, האט ער נישט געקענט חלום'ען אז די צוויי זענען גאר נאנט פארוואנדט, זייער דרויסענדיגע אויסזען האט זיי פונאנדערגעשייד ווי הימל און ערד.

דער פרומע פעטער איז אלץ געווען פארנומען מיט עבודת השם און אויך געטון אסאך חסד אקטיוויטעטן, אבער ווען ס'איז געקומען צו די נושא פון געזעצן און רעגולאציעס איז דער נעפע געווען דער העלד, ער האט אויסגעפאלגט מיט א פונקטליכקייט אלעס וואס שטייט אין געזעצבוך און איז געווען באהאווענט אין יעדע פאראגראף פון די שטאטישע פארשריפטן.

זיין קארעקטקייט האט נישט געשטאמט פון די גמרא אדער פון א תורה'דיגע בליק, נאר גיכער פון זיך אנזאפן מיט גוישע קולטור און אויפגעקלערטע עדיטאריעלס, ער איז נישט געווען אין די זעלבע פירעקיגע באקס ווי זיין אומוויסענדע פעטער, ער איז געווען אנגעפילט מיט וויסענשאפט און פארשידענארטיגע פילאזאפיעס.

דאס פלעגט טאקע כסדר זיין די רויטע שמאטע וואס האט אנגעצינדן פינקן צווישן אים און זיין פעטער, ער האט נישט פארטראגן קיין פאלטשע דאקומענטן אדער שמוגלערייען, ער פלעגט דאס אנרופן "יידישע חכמות", אדער "חסידישע דרייעכצער", ס'פלעגט אים בכלל נישט געפעלן.

זיין פעטער האט אים אבער טאקע נישט געזוכט צו געפעלן, זיינע החלטות זענען געווען געבויט אויף א "דעת תורה", אויף א בליק פון א יידישע ערליכע שטאנדפונקט, ער האט זיך גאנץ ווייניג צוטון געמאכט פון זיין פלומעניקס לאזונגען ווי "דינא דמלכותא דינא", אדער "ונשמרתם מאוד לנפשותיכם" און אנדערע צויבערדיגע לשון הקודש ווערטער וועלכע ער האט געטראפן פון אונטער די ערד און דערמיט בארעכטיגט אלע זיינע מיינונגען.

דער האט עס אבער געמיינט ערנסט, ס'האט אים באמת וויי געטון די התנהגות פון די אומדיציפלינירטע פערשוינען, אין זיינע אויגן זענען די חברה פשוט לייכטזיניג און עגאאיסטיש. נאך דערצו איז ער געווען שטארק אונטערן איינפלוס פון די אלע העצערייען וואס ער האט געליינט אויף די סאציאלע נעצן וואס האבן אויף אים געטון ווירקן.

דער אמת איז, אז ווען ס'איז געקומען צו אזעלכע ערשיינונגען האט ער נישט איינמאל געקלערט פון אפהאקן דאס שייכות מיט זיין פעטער, ער האט אפילו געהאלטן אז ער מעג אים גיין מסר'ן און איבערגעבן פאר די אינסטאנצן, ס'איז אים שווער אנגעקומען, אבער ער האט מיט לייד געמוזט אנערקענען אז זיין אנקעל איז א שטיקל קרימינעל.

ווער רעדט נאך ביי די לעצטע שמוגלעריי וואס ער האט פלאנירט, ווען אין זיינע אויגן האט זיין פרומע פעטער איבערגעטרויטן די רויטע ליניע, האט ער נישט געקענט קומען צו זיך פון שוידער.

ס'האט אים וויי געטון ביז גאר, אבער זיינע פארקרומטע דעות האבן דערגרייכט א זעלבסטפארשטענדליכע פארשטאנד אז ער האט אפילו גאר א "פליכט" צו די מענטשהייט צו גיין אנקלאגן זיין אויפהאדעווער און באליבטן פעטער.

דא איז אבער געקומען די מאמענט וואס טראץ זיין דראנג צו קארעקטקייט, האט ער זיך מתגבר געווען אויף זיין נסיון און מחליט געווען נישט צו פּלַאפֶּען, נאר ענדערש האלטן דאס מויל פארמאכט און די ליפן צוזאמען געדריקט און דאך שיצן זיין פעטער און מומע פון אן אומבאגנאדיגטע שטראף און צרה.

טאקע דערפאר האט ער זוכה געווען צו ווערן ארויסגעראטעוועט פון די איבערגעקערטע סדום ועמורה!

נאכ'ן פארשטיין די פארקרומטע גראדקייט פון לוט, קען מען ערשט פארשטיין פארוואס טאקע איז זיין שכר פאר בלויז שווייגן און נישט פאר'מסר'ן זיין פעטער אברהם אבינו אזוי גרויס!

זיין פאר'גוי'שטע קארעקטקייט האט געמאכט אז נישט מסר'ן איז געווען פאר אים א אומבאשרייבליכע נסיון!

[פאליטישע עקספערט]

[בפשיטות]

פיינע ארטיקל!!!

[יקוש פייוויש]

נאכאמאזעל האסטעס יעצט געלייגט… ווער ווייסט צו כ׳וואלטעס אמאל געזען.. שכח!

[מי שברך]

נישט געכאפט ביזן סוף ווי אהין די צילסט.

[מסתמא]

פיין פיין, גאר גוט

[Masmid]

[בייגעלע]

[תלישא קטנה]

wow masterpiece !!!

[היכי תמצא]

ס'איז עפעס אפנארמאל. די אנאלאגיע ברענגט אזוי גוט ארויס די אויספיר מיט א טיפערע פארשטאנד. יש"כ.

[מטעמים]

געוואלדזשענע!! שטארק הנאה געהאט.

[בשעה שיש]

שמחת, אוואו געווענליך, אויסנאם גוטער שפראך! קלארערע פוינט! בקיצור א גראדע ארטיקל!

[און שוין!]

[בשבילי נברא]

הערליך הערליך!

[נו גוט נו שוין]

כהאב געווארט אויף א לאנגע רוסישע פארזעצונג, וואו דער פלומעניק וואקלט זיך אויב ער זאל איבערגעבן דעם פעטער צו די קאמעניסטישע אינסטאנצן, אבער האסט עס צוריקגעפירט אפאר טויזנט יאר פריערט
געוואלדיג!!

[שלמה מולכו]

אה! א שמחת עולם ארטיקל האט נישט קיין קאמפאטישן!
מעסיוו!

ס׳ערשטע מאל אנגעשטויסן אין דעם ווארט ״גירכע”.

[שמחת עולם]

א דאנק פאר אלע קאמפלעמענטירער!!!

@שלמה מולכו, איך האב געוואלט שרייבן "גיכער", למעשה האב איך יעצט אויסגעבעסערט און געשריבן "געכער", לכאורה איז דאס די ריכטיגע וועג צו שרייבן דעם אויסדרוק (איך נוץ עס דא און דארט ביים רעדן... אפשר אין אמעריקא איז דאס נישט אזוי באקאנט... איני יודע...)

[היכי תמצא]

אלץ אן אמעריקאנער האב איך קיינמאל געהערט "געכער", אבער "גיכער" איז יא באקאנט. איך גלייב אז יעדער אידיש רעדער אין אמעריקע פארשטייט וואס "גיכער מיינט.

[שמחת עולם]

אלץ אן אמעריקאנער האב איך קיינמאל געהערט "געכער", אבער "גיכער" איז יא באקאנט. איך גלייב אז יעדער אידיש רעדער אין אמעריקע פארשטייט וואס "גיכער מיינט.

נאכ'ן אביסל ארום זוכן אויפ'ן געוועב, קוקט אויס אז מען מוז עס טאקע שרייבן "גיכער" גיכער פון "געכער"... די פוילישע אפשטאמיגע אידן זאגן דאס ארויס "געכער" אבער ס'קומט געשריבן לכאורה טאקע "גיכער" - און איך האב עס טאקע געטוישט יעצט.

[היכי תמצא]

אלץ אן אמעריקאנער האב איך קיינמאל געהערט "געכער", אבער "גיכער" איז יא באקאנט. איך גלייב אז יעדער אידיש רעדער אין אמעריקע פארשטייט וואס "גיכער מיינט.

נאכ'ן אביסל ארום זוכן אויפ'ן געוועב, קוקט אויס אז מען מוז עס טאקע שרייבן "גיכער" גיכער פון "געכער"... די פוילישע אפשטאמיגע אידן זאגן דאס ארויס "געכער" אבער ס'קומט געשריבן לכאורה טאקע "גיכער" - און איך האב עס טאקע געטוישט יעצט.

כאנישט געוויסט אז די פוילישע זאגן דאס ארויס "געכער". אנטשולדיגט, כ'האב קיינעם געמיינט צו באטרעפן.

[לכאורה]

באמערקנדיג נעכטן אז שמחת עולם האט זיך צעשריבן, האב איך געשעפשעט א שטילע געבעט אז איך זאל טרעפן צייט אין נאנטן צו קענען דאס אפליינען, דען איך ווייס שוין היינט אז ער האט אימער גוטע בייפעלער און באגלייט דאס מיט שיינע פראזן און א זיסע מעשה'לע. און טאקע היינט האב איך ב"ה געטראפן די פאר מינוט, און איך בין נישט אנטוישט געווארן! יישר כח שמחת עולם!

[יש בו]

אייזערנע ארטיקל

[ענדע צדיק!]

גוט און צום פינטל, מיט א שריפט בעסער פון גוט. געוואלדיג!

[בלעכענער פנים]

נישט געכאפט ביז די לעצטע סקונדע ווי די צילסט...

גאר שיין געשריבן, שכח!

[פעיק ניוז]

מורא'דיג!